Proverbs 9

Makaribisho Ya Hekima Na Ya Upumbavu

1 ^aHekima amejenga nyumba yake;
amechonga nguzo zake saba.

2 ^bAmeandaa nyama na kuchanganya divai yake;
pia ameandaa meza yake.

3 ^cAmewatuma watumishi wake wa kike, naye huita
kutoka mahali pa juu sana pa mji.

4 ^dAnawaambia wale wasio na akili,
“Wote ambao ni wajinga na waje hapa!

5 ^eNjooni, mle chakula changu
na mnywe divai niliyoichanganya.

6 ^fAcheni njia zenu za ujinga nanyi mtaishi;
tembeeni katika njia ya ufahamu.

7 ^g“Yeyote anayemkosoa mwenye mzaha
hukaribisha matukano;
yeyote anayekemea mtu mwovu
hupatwa na matusi.

8 Usimkemee mwenye mzaha la sivyo atakuchukia;
mkemee mwenye hekima naye atakupenda.

9 ^hMfundishe mtu mwenye hekima
naye atakuwa na hekima zaidi;
mfundishe mtu mwadilifu
naye atazidi kufundishika.

10 ⁱ“Kumcha Bwana ndicho chanzo cha hekima,
na kumjua Aliye Mtakatifu ni ufahamu.

11 ^jKwa maana kwa msaada wangu
siku zako zitakuwa nyingi,
na miaka itaongezwa katika maisha yako.

12 ^kKama wewe una hekima, hekima yako itakupa tuzo;
kama wewe ni mtu wa mzaha,
wewe mwenyewe ndiwe utateseka.”

13 ^lMwanamke aitwaye Mpumbavu ana kelele;
hana adabu na hana maarifa.

14 ^mHuketi kwenye mlango wa nyumba yake,
juu ya kiti katika mahali pa juu sana pa mji,

15 ⁿakiita wale wapitao karibu,
waendao moja kwa moja kwenye njia yao.

16 ^oAnawaambia wale wasio na akili,
“Wote ambao ni wajinga na waje hapa ndani!”

17 ^p“Maji yaliyoibiwa ni matamu;
chakula kinacholiwa sirini ni kitamu!”

18 ^qLakini hawajui hata kidogo kuwa wafu wako humo,
kwamba wageni wake huyo mwanamke
wako katika vilindi vya kuzimu.